Það verður líf og fjör í félagsmiðstöðvum eldri borgara í Kópavogi föstudaginn 18. og laugardaginn 19. september. Boðið verður upp á bingó, harmonikkutónlist, félagsvist, góðan mat og söng ungs tónlistarfólks.
Fjörugur föstudagur
Dagskráin hefst í Gjábakka á föstudeginum með bingói kl. 13:00. Þar gefst gestum gott tækifæri til að hittast, eiga notalega stund saman og freista gæfunnar. Þetta er fyrsta bingóið eftir langt hlé og vonandi verður hægt að halda því áfram.
Kl. 13:30 verður harmonikkufjör í Gullsmára. Gleðigjafarnir mæta með harmonikkurnar og Bryndís verður með þeim. Þau ætla að halda uppi góðri stemningu með söng og fjörugri tónlist. Gestir mega því búast við skemmtilegri stund.
Um kvöldið verður síðan spiluð félagsvist í Gjábakka. Spilamennskan hefst kl. 20:00. Félagsvistin hefur lengi notið vinsælda og þar fer saman skemmtileg keppni og góður félagsskapur.
Ungir tónlistarmenn heimsækja Gullsmára
Laugardaginn 19. september verður opið í Gullsmára frá kl. 12:00 til 14:00. Boðið verður upp á súpu og brauð ásamt heitu kaffi og notalegri samveru.
Hápunktur dagsins verður heimsókn Þjóðlagahóps Tónlistarskóla Kópavogs. Hópurinn kemur fram kl. 13:00. Þjóðlagahópurinn er skipaður ungu og hæfileikaríku tónlistarfólki sem leikur fjölbreytta og líflega þjóðlagatónlist. Það setur skemmtilegan svip á laugardagsopnunina að fá unga fólkið í heimsókn og sjá kynslóðirnar mætast í gegnum tónlistina.
